憑《刑事偵緝檔案》獲封「師奶殺手」的陶大宇,在92年《大時代》中飾演打家劫舍、姦淫擄掠,集所有壞事於一身的丁益蟹,雖然角色衰到貼地,但大宇仍要特別多謝監製韋家輝帶挈,大宇說:「佢拍完《大時代》之後好快離開TVB,原來佢臨走之前交帶咗好多身後事,就係叫其他監製同幕後人畀多啲機會大宇,話呢件好嘢嚟!真係好多謝韋家輝。」

回想《大時代》第一場掟仔落街經典場面,大宇指四蟹本來要吊威吔真跳,大宇說:「嗰場戲好辛苦,拍咗20幾個鐘頭,廠景到朝早10點,緊接到灣仔商業大廈天台拍,開頭設計set威吔真跳,但真係太危險,我哋又唔夠瞓,唔夠體力,所有配套唔能夠好安全拍呢場戲,導演同武指研究過,最後取消呢個念頭。」

大膽創造角色

大宇戲份不及大佬孝邵仲衡,但角色卻是四兄弟中最搶,大宇笑說:「個角色真係好搶,我自己又演得比較大膽,因為嗰時冇人理我哋,理都理秋官同青雲哥,我呢啲老茄連海報都冇張相,基於咁嘅理由,畀我哋自由度好大,我可以創造呢個角色出嚟,冇包袱。」

大宇跟劉青雲同期訓練班畢業,眼見青雲當主角,大宇直認十分羨慕:「青雲你就好啦,接到一部神劇,個角色又咁好發揮、咁漂亮。當時我覺得呢部戲唔係屬於我,但𠵱家睇番,都好多謝網民觀眾咁留意我,我可以參與到呢部神劇,都有少少無悔。」若然可以重新「洗牌」,最想演那個角色?大宇笑說:「當然方展博,呢個角色幾完美,好有發揮空間,反差好大,但當然青雲會演繹得好過我啦。」


攝影:陳志嵐
場地:Fifth Salon


蘋果日報 2015.05.30

tag:陶大宇, Michael Tao, TVB, 大時代, 刑事偵緝檔案

文章標籤
創作者介紹

BELOVED

婕兮 發表在 痞客邦 PIXNET 留言(0) 人氣()