BELOVED

陶大宇與黎耀祥相識十多年，這份兄弟情誼建基於2000年二人合作之《影城大亨》，祥仔借今次與大宇摸酒杯底，娓娓道來當年得陶大宇協助而銘記在心等不為外人知的事，對祥仔照顧有加的大宇，則認為對方雖比自己年少，但其高EQ卻可彌補他情緒上的缺失。

黎 = 黎耀祥
陶 = 陶大宇

陶：祥仔，你兩屆視帝，我的確好戥你開心，要我形容對你贏到呢兩個獎嘅感覺，兩句說話：「心服口服、得來不易！」

陶大宇與黎耀祥兩人摸酒杯底，盡訴心中情。

大宇關照齊登台

黎：多謝！多謝！其實我都好珍惜今次同你敍舊機會，可以飲少少酒，大家摸吓酒杯底傾心事，對你以前關照我嘅種種，我仲銘記在心！當年合作《影城》日日相對，拍咗六、七個月時間，每朝開工，你買咖啡總會預我一份，2000年我喺廣播道買樓，都搵你問意見，你買「波子」（Porsche保時捷），我又會叫你揸返嚟影廠一齊欣賞，又試過一齊炒股票，一齊「賴嘢」……哈哈！總之大家一齊經歷好多，交往好密切，經常噓寒問暖！拍完個劇好唔捨得，每次都想見番你呢個阿哥！

陶：其實我都有好多人生道理要請教你，而你又畀到答案我，雖然有啲似是而非……哈哈！加上當年我都幾火，好忟憎，睇唔過眼就爆……不過，我兩個從未鬧過交，我發洩後又冇事！

黎：我仲記得，當年一齊做騷又送呔給我，就連我買樓時，可能你知我「唔掂」……喺內地登台都預我一份，將自己騷錢都分一半畀我，你仲記唔記得？

陶：哦……嗰次正好遇上一位老闆搵我到內地登台，我同老闆提議多一個藝人，但對方話唔使只要我一位，我為咗想同你一齊演出，我就同老闆講：「我送多一位藝人畀你搞氣氛，人工照舊！」當時我仲問你：「祥仔，你平日登台收幾多？我照畀你，一齊上嚟玩吓！」咁我就將我自己嘅酬勞部分分畀你，多、少幾萬收入對我嚟講其實冇太大分別，但我好開心，大家可以一齊唱吓歌、玩吓又當去旅行！

將情緒用於角色

黎：大宇哥你咁重情，每次起、居、飲、食你都照顧我……

陶：我仲記得拍《影城》時，我連你着嘅襪都幫你買……當時我哋喺影廠排戲，睇見你着嘅襪釘住牌，但個劇係六、七十年代，戲服又係吊腳褲，為配合戲劇背景，我跑咗去買了半打白襪畀你開工用。不過，只限買襪，底褲就留畀你老婆買！

黎：係喎……當時我仲以為對襪拉高唔太覺眼，但你就睇得好細心！

陶：可能我係處女座，凡事都追求完美，所以我對拍戲，每遇到睇唔順眼就會上火……

黎：連我對襪你都咁留意，證明你好細心，難怪拍戲你會咁躁！因為拍戲實在太多細節，外間誤會你發脾氣，其實你係追求完美，反之我就比較睇化，因為我習慣呢行嘅遊戲規則，你發脾氣，對件事又唔會有幫助，不如將這份情緒用喺適合角色上。

陶：兩屆視帝嘅金石良言，性格應用喺演戲角色而非待人接物！你EQ高，我都要靠你安撫，記得早幾年拍《掌上明珠》喺電視城再遇到你，有時都會因工作上忟憎，而我又會走過去搵你去傾吓偈，好多事當抒發完又冇嘢，所以我估當時我都煩你好多！

陶大宇大讚黎耀祥有高EQ，可以補足他情緒上的缺失。

願做「帶子洪郎」

黎：不過，兩、三年冇見，大宇今次見番你，其實你內、外畀我嘅感覺都冇乜變，反而多咗一份經歷，眼光亦沉穩咗！猶記得以前你似有團火咁，行路亦似衝鋒，節奏好快，而今次你畀我感覺回落咗啲，淡定咗，比以前更舒服！

陶：階段唔同咗，你喺我眼中亦都長大咗，做咗慈父，你個仔好乖、好跟你，又會同你影相，換轉時下嘅青少年，同家長相處好有隔膜，唔係打遊戲機，就係拿手提電話玩，願意跟你出入，好難得！

黎：我又唔介意做「帶子洪郎」，等佢體會父母嘅工作環境，亦想個仔了解呢個娛樂圈嘅生態！

陶：相當同意，不過，我唔太習慣有親人喺我工作範圍出現，因為太有壓力，我會擔心親人呆等會悶，反而分心自己工作而唔投入，所以我好佩服你可以接受到！

黎：我都會有呢個感覺，因為工作需要，我都會同其他對手溝通，甚至女對手，大家都要互相了解，習慣了對方節奏先可融入演戲中，會更自然……所以會有啲尷尬位，我都會同老婆講，最好唔好跟！

陶：咁你太太會好明白，佢好好……有家人陪，其實好幸福，正如最近你喺橫店開工，你太太都有陪你，照顧你！

黎：嗰次去橫店係為《大太監》拍外景，休息時間冇問題，反而係當地太多旅客圍觀，我哋喺影城內取景，個地方係旅遊區，所以好多旅行團買票入場參觀，難為我哋要經常「攔人」而NG，阻住進度，辛苦就係當時又熱又曬又着厚厚古裝「焗等」！

陶：但你好捱得，當年你拍《影城》時，外面又拍電影，見你幾乎冇覺瞓，幕後人員見到你捱都搖搖頭……嗰時劇組收機，你趕去拍電影，廠外有車等住接走你！

黎：嗰時最高峰可以忙到四日冇瞓落張床，當年我個仔仲未出世，老婆又大肚，而我係電影新人，好多電影都想用我，但又唔係主角，戲份唔多，為賺錢，我頂硬上都會接拍，最高紀錄有六組戲喺身！今時今日有呢個底子，都係當年捱出來！

黎耀祥經常帶兒子到自己工作的地方參觀。

採訪：影視組
攝影：黎志輝
場地：WHISK（The Mira Hong Kong）

東方日報　2012.07.01

宇哥專訪連四發 -
　　　　 2012.06.17 陶大宇郭可盈　舊相好爆當年情
　　　　 2012.06.24 Bobby爆大宇用褲　菲女嘲small
　　　　 2012.07.08 周海媚解宇心結　有緣再咀


tag:陶大宇, Michael Tao, 黎耀祥, 壹號皇庭, 影城大亨, 開心賓館, TVB