駱應鈞、陶大宇與歐陽震華相交廿多年,笑料一籮籮。


過百集的經典劇《壹號皇庭》,造就了陶大宇、歐陽震華(Bobby)和駱應鈞(阿公)成為老友,三人重聚暢談當年軼事,笑料百出。堪稱「笑料貨櫃」的Bobby大爆大宇當街甩褲,更被菲傭取笑「small」!大宇卻反嘲對方當街PK,二人加埋近百歲還樂此不疲,最老正的阿公坦言三人聚首是何等難得和極具紀念性。

陶:我幫你哋諗好形象,三人行埋都有不一樣嘅感覺……

Bobby:你就話打Bow連戲,但我就再搵唔到從前嘅髮型!我個頭仲年復年變圓,遲啲要倒吊瞓,等面皮唔好鬆……哈哈!

阿公:《皇庭》至今已經廿年,我哋再一齊坐埋,認真難得,好值得紀念!以前拍劇就專飛紙仔,不過我依家就轉咗新公司(CTI),公司規定唔可以飛紙仔!


大宇拍咀戲,經驗豐富


咀陳慧珊唔停口

Bobby:其實觀眾鍾意睇我哋幾兄弟嘅屋企戲,但我就鍾意睇大宇嘅kiss戲!佢同陳慧珊、宣萱拍咀戲,嘩……拍到「施施SirSir」,放消夜、收機仲喺度緊!

陶:又唔係我要求,不過通常對手都對我好好,陳慧珊嗰次仲係「螢幕初吻」!

阿公:佢哋個個鬼妹仔性格都好主動,你同陳慧珊嗰場,真係好正!

陶:你又知正?係正都只有我知……哈哈!

Bobby:講到拍咀戲,我遇上關詠荷,嗰次咀戲我真係學到嘢!自己拍咀戲怕醜又「蛇Ger」,點知當日我同佢拍咀戲時,佢竟然拍攝中途講嘢……叫我面口唔好疊住佢,鏡頭後我仲怪佢唔投入,後來佢話邊講邊咀會好逼真,果然拍出嚟又真係好有效果!唔信嘅話,大宇你試吓!

陶:唔會啦……到咗呢個階段,我已經唔敢喺鏡頭前錫女仔,早晨一個輕吻還可以,要談戀愛式激吻,嘩……好核突!

Bobby:我試過同蔡少芬有一場激吻戲,好驚……你話好似大宇有輪廓下巴兜兜拍咀戲就話好睇,我呢啲扁口扁面,一撞埋乜嘢眼、耳、口、鼻都唔見晒啦,所以我想到一個辦法同少芬講:「到時我錫吓你塊面,再唔係錫埋你額頭就夠!」佢竟然答我:「唉喲……我都係咁諗!」頂……


阿公家有私人健身室,保持fit爆身。


阿公fit過羅仲謙

陶:阿公拍差人戲都好辛苦,拍查案走勻全港,不過阿公生活好有規律,當年我去佢屋企,已經見佢有私人健身室,依家身形仲係Keep得咁fit,比羅仲謙更好!

阿公:當年拍一場查案戲可以拍十一、二日,當年後生,不過依家我都有保持運動量,幕前都要見得人o架!

陶:其實我哋個個都貪靚,拍《皇庭》時我要求場場換衫,要唔同顏色,所有Bow都係私伙!

Bobby:你(指大宇)連睡衣都要全白絲綢,着到好似「白龍王」咁!有一次外景喺街邊換衫大出洋相……當日係星期日,喺皇后像廣場取景,我同你攞住戲服,本來想行過去酒店換,但又想快,索性喺外景車旁換,點知你解開褲頭,竟忘記個銀包袋咗喺後袋,結果墜甩咗條褲,成條褲跌到落腳眼呀,現場大群菲傭見到呢個露底場面不禁大叫:「oh!Michael…… small!」我睇到反白眼!我只好話:「下次勤啲換底褲啦!褲頭橡筋都變成波浪紋啦!」哈哈哈哈……

陶:你夠因為戴黑超,喺商場睇唔到路,行扶手電梯踩錯腳PK啦!哈哈!

Bobby:你仲好意思講,嗰次唔係你笑聲震天,都唔會全個商場啲人都知道啦!個個望過嚟,我不知幾尷尬!


Bobby將絲巾縛在頭上,認真鬼馬。


兄弟同心良性競爭

當年三個後生仔,不為上位明爭暗鬥、互篤背脊,反而兄弟同心,衝勁十足,連收工都約埋歎咖啡度戲。

Bobby:我哋兄弟雖然貪玩,不過工作就很團結,每拍完都會去附近茶餐廳傾吓戲,每個人心態都好好、好Fit!我都有問監製(鄧特希)點解搵我哋這班二線演員演出,佢話搵一線演員可能戲份會集中一個人身上,但係全班都係二線,就可造出良性競爭!

阿公:我都發現一個現象,我哋兄弟不止有監製計算嘅效果,就連互相交惡、爭戲情況都冇,感情之好,仲可以合作五輯都冇變,實在好難得。要是其他劇,大家演員長時間對住,好多都會有爭拗!

Bobby:所以我好期待《皇庭》長拍長有,仲要搞多啲聚會……

陶:我哋呢班爛玩兄弟已踏入人生另一階段,時至今日要再走埋一齊,相信監製都要諗一啲「新口味」配合至得!


大宇和Bobby鬥爆瘀事,嗒落有味



東方日報 2012.06.24

宇哥專訪連四發 -
     2012.06.17 陶大宇郭可盈 舊相好爆當年情
     2012.07.01 黎耀祥 得「宇」恩果 千年記
     2012.07.08 周海媚解宇心結 有緣再咀




2012.06.19 陶大宇微博
一連串做了四編東方日報專訪!!壹號皇庭粉絲們,,留意啊!!
我和皇庭一班老朋友的訪問,會在24號星期日登出!!



2012.06.23 陶大宇微博
親愛的粉絲們,東方日報專訪明天又來了,
我代表壹號皇庭祝大家端午節快樂,平安,幸福!!



2012.06.24 陶大宇微博
能夠同一班好朋友,好拍檔一起做訪問,真是很難得!
把這些回憶和歡樂送上!祝你們開開心心快快樂樂!



tag:陶大宇, Michael Tao, 歐陽震華, Bobby AuYang, 駱應鈞, 壹號皇庭, File of Justice, 青出於藍, 和味濃情, TVB

文章標籤
創作者介紹

BELOVED

婕兮 發表在 痞客邦 PIXNET 留言(0) 人氣()