專訪｜怪異集　馬國明－BELOVED

馬國明的Nokia手機，單色mon，無得影相無得聽歌，購入價四嚿，現已停產。「咁耐以嚟我換過三部，每次用到壞才買。拖住阿媽入電器鋪，同店員講：『我只要打入打出、收發短訊，不要任何花巧嘢。』結果找了許久才找着這部，滿足晒我。」

氣氛有點詭異，事緣我追問他作為上位一線小生仍每天逼廠巴返電視台，解極我唔明。馬國明於是抖出手機來舉例：「凡事實實際際就得。」UBC機械工程系畢業生娓娓道來：「呃我唔到，愈多功能愈易壞，愈影響接收，電池又無咁耐用，彩色mon好食電；正如在香港揸車也不太實際……」都對都對，理性上難以駁倒他；感性上，我開始覺得馬國明人如機器，尤其那硬膠殼。

十年跑龍套熬出頭，唔買車唔諗樓唔夜蒲，最奇奇在並非花不起。如果苦行僧是為了禁慾，在他是根本無需要，連禁慾的慾也談不上——人生還有樂趣嗎？

「我幾無趣o架。」

或者這才做到成功人士，因為，另一位我遇過至今仍用單色mon手機的，是我上司。

無車一身輕

訪問前一天，雜誌影到馬國明逛車行；以為他覺今是而昨非，這天馬國明苦笑說：「諗吓啫，未落實，油價咁貴……」

每日，馬國明由住處搭地鐵至將軍澳站，轉乘廠車到電視城。「我讀理科，是個計數的人，有需要才call的士，一個月的士費還不及停車場租，未計養車。

「最主要是我不覺得搭地鐵是問題，有時觀眾會打招呼，我便笑笑揮揮手，頂多要求合照，有幾唔方便呢？可能我未夠紅，傾偈也只一兩句，不會糾纏。唯一一次我趕着背熟劇本口噏噏，聽到乘客交談：『你睇佢做戲做到傻咗。』實在太累或不想應酬的日子，我便call的士。」

於是令人想到馬國明慳家，想到小生們座駕有如名車展。

馬國明耐性十足理據充分：「不純粹為慳錢，我在外國也揸車返學，應用則用，在香港，成日塞車很麻煩，出外景要搵位泊又驚抄牌，最好坐大隊車，不用分心，專注演戲。一個人的成就與私家車無關，羅蘭姐都係搭城巴收工，影后喎。

「我未試過俾人笑：『吓乜你無車o架？』因為我永遠搶先笑笑口說：『我無車o架。』你說這樣怎做一哥、叫夥計怎跟我搵食？我不覺得有人會跟我搵食，就算將來有自己公司，都係彼此合作啫。」

裙腳仔

馬國明總結說，即使買車也只為全家放假郊遊。他與家人同住太古城，被影到揀車時，他拖住阿媽（又拖住），三十四歲的馬國明自認「裙腳」。

「你問我幾時置業？現住的已經是家庭的物業呀；我想買樓，買大啲同屋企人住囉。說自立，我真未諗過搬開住，爸爸退休了，媽媽家庭主婦，我算開始有點事業養家，independence是不用依賴，反過來可以讓老人家依賴一下我，豈不更有滿足感？

「我喜歡繑住阿媽行街，十二、三歲時有幾年無繑，怕人家以為自己不成熟，會怕，即是才不成熟。」

但從未見馬國明在父親節母親節表演真人show。

「我媽媽害羞，喂其實刊登可不可以打格仔？如果話觀眾是藝人老細，觀眾不想睇嘛；你做其他行業，會不會要帶阿媽俾老細見？」

加燦

構成特有性格，馬國明說，應該與「加燦」出身有關。九七前移民潮，馬父做「太空人」，馬母陪兩女一子到溫哥華讀書，「順便移民，學費慳好多。」馬國明唸機械工程——典型大好青年又有點不合時宜的學科。

大方向由母親和兩姐姐管教，粗重工夫如剷雪剪草作為唯一男丁責無旁貸，養成既婆媽又堅強。身處UBC，每年港姐來此揀蟀，馬國明卻說未遇過靚女，「女生好少讀工程。」唉係人都知理科仔要溝女溝過隔籬系啦。

到畢業，全家回流，白忙一趟，還驚覺已追不上香港潮流，或者說根本不想追上。

「我知道大家覺得我怪異，但如果不在娛樂圈，我的行為其實算正常。」
對，沒一點貪慕虛榮（好聽叫追夢），怎吃這行飯？

馬國明說：「表面上我可以告訴你為興趣，我在大學搞過劇社，題材探討留學生所遇到的問題……」

OK，實際上呢？

「實際上就是回流撞正金融風暴，機械工程尤其難搵工，我send了六、七十封求職信，醒起自己還有演戲這門興趣，結果唯一回音就是藝訓班，四千元月薪，阿媽話齋：『好過坐喺屋企吖。』我是一個特定時代下的產品。

「如果有得做工程師，trainee都好，我一定不做藝員。但怎說呢，我是入了一行便輕易不會轉工。我這一行——或者很多後生仔投身社會都是如此：機會來得不快不慢，每次有點心灰意冷時上頭又提升你少少，回頭一睇，咁又十年嘞。」

食不到臭豆腐

馬國明的故事就是如此，沒有奇蹟，甚至由跑龍套捱出頭娓娓道來也不勵志，並非他無志，而是壓根兒他不認為有一步登天的秘訣。

「龍套是沒有所謂出位的，最緊要唔好麻煩到劇組，要埋位時即刻埋到，不要唔知走咗去邊，俾PA（助理編導）鬧兩句不要駁嘴駁舌，已經算稱職了，而並非在表演上如何加倍認真。幾年下來每日路人甲乙丙很難說學到什麼，學到是在現場看看主角們怎預備。

「與其說勤力不如說廣結善緣。臨時有人甩底，PAcall問返不返到工，其實無話唔得，通常是難得放假約了朋友正在玩，看你捨不捨得唔玩，幫手啃咗，PA下次醒多一句對白當補償，或者介紹給導演，加些少戲，然後導演介紹給監製，如此而已。」

三年前被提拔參演《衝上雲霄》算是奇遇吧？「Tommy（無綫高層梁家樹）召見我，都只傾幾句閒偈，我亦只預備一段簡短實際的自我介紹，怕阻人時間嘛。到頭來，我懷疑根本每個老細寧願夥計企企理理唔好煩就得。」

馬國明的企理，不煙不酒不夜蒲。「同事生日，我會去飲點酒，但始終唔慣威士忌嗆喉，又怕嘈。我不是純情，是口味問題，正如不可以話食到臭豆腐的人就不純情。我不去蒲並非怕學壞，抱着這心態會忍得好辛苦。」

風雲際會，馬國明是今年產量最高的小生，他靦覥說：「咁啱啫，因為我未企定，男二（第二男主角）又得，男一又得，客串都得；企定一線的，劇集不能隨便開隨便接；而真正一線，更寧願多上大陸搵真銀。才輪到我。」

人家學劉德華梁朝偉，他學許紹雄。

「我從Benz身上學到最多。聽Benz說，每次電影記招完結，主角被記者纏着回應私人敏感問題；他拍拍籮柚就走得——你話幾好。」

但這次訪問也不容他拍拍籮柚。關於曾華倩，馬國明說：「一路是好朋友，朋友就無謂分開不分開，現在有時通通短訊。」

據說因為曾的兒子接受不了媽媽這小男友，又或者馬國明怕與失婚女人談戀愛影響形象——照計不會，都什麼時代了，觀眾喜愛曾華倩，而馬國明明顯是一主好人家。

「我都喜愛華倩，好難搵到個咁夾的朋友。這件事上她一直無乜嘢，直至傳媒麻煩到她囝囝……」

轉換話題，馬國明說，電視劇大眾化口味，男一性格永遠四平八穩，反而男二容許天馬行空更大發揮，所以祝賀他《甜言蜜語》終於坐正，他卻坦言enjoy做副手好玩又無壓力。

何止，最近播出的《師奶股神》裡，還會驚見馬國明做回律師乙——飲水思源憶苦思甜？言重了。「貪玩啫，是剛有個break，隔籬廠導演叫幫手，我便去；還有一次古裝，我勝在咁啱未拆頭套，又過過鏡囉，連對白都無。因此俾高層鬧過，話影響觀眾混淆喎。」

拿他沒法子。奧運六星也好，四大名捕也好，卅字頭馬國明順理成章被認定比廿字頭同期小生成熟穩重，其實，不通世務的大男孩加燦遇上眉精眼企MK男如吳卓羲，你認為誰更有赤子之心？

索愛

終於想出一項有車的好處來再問馬國明——識女仔方便嘛。

「對，」馬國明苦笑說：「有車，講一句『送你返屋企』的確較順口。尤其娛樂圈女仔最現實，出席function穿得性感不可能跟你逼地鐵任人評頭品足——但我又覺得，女仔在你無車時也鍾意你，才是真正對你好。如果她睇車來揀男朋友，無意思吖……」

唉，我開始懷疑傳聞中曾華倩被馬國明「悶走」恐怕屬實；我又醒起，另一位他新鮮熱辣的緋聞女友徐子珊，不是收過黎明饋贈的MiniCooper嗎？還有伊人在駕駛學院廣告裡俯伏軚盤那副冧樣……馬徐之戀，應該亦無結果。

公平原則，引言提及Nokia，這裡介紹另外兩大品牌：實事求是馬國明，大概不用擔心「無得撈啦」（Motorola），但論到要「索愛」（國內對索尼愛立信的簡稱），比較難。

撰文：余家強
攝影：李劍輝
協力：梁慧珠、麥潔瑩、鍾琰
髮型：VanChan@Hair
化妝：Peggycheng@BeatutyTech
服裝：Guess
場地提供：BackStage
mailto:nextb@nextmedia.com

壹周刊　第957期