最近愛看《愛。回家》,因為夠瘋狂。

瘋狂在年齡無界限, 53歲的林漪娸可以與37歲的徐榮配成一對; 70歲的劉丹也可以有個42歲的妹妹郭少芸。

「唔算離譜,遲啲《造王者》我做黎諾懿阿媽呀!嬲到我死,日日見到佢我都鬧:『你個衰仔唔後生過我好多,要我做你阿媽……』」

當然,郭少芸在說笑而已。哪怕今個劇是孻姑姐,下個劇是皇阿媽,有甚麼好得過綿綿無盡的曝光率?

還未計早前已出現過的《衝呀!瘦薪兵團》、《拳王》、《 4 in Love》。

「今年真係好變態,觀眾到2013都無好日子過!」

郭少芸笑得很豪邁。曾離開無綫四年,在商場看過風雲變色,最後還是回到老家。演技與歷練到底成正比,能夠不知不覺地常伴觀眾左右,那才是最高境界。

「唔走過,真係唔知自己原來咁鍾意做戲。」放心,香港人從來無乜好日子過,我情願俾郭少芸洗腦。

有鬼明星夢

差點忘記了,原來郭少芸是選美出身。那是 1992年的事,距今整整二十年。

「有鬼明星夢!係發明星夢十八歲已走去選啦,我選時已廿三,差不多超齡咁滯。」

她本是在中環律師樓上班的白領麗人,洋人老闆請她當秘書,一星期上班五天,一年三星期大假。據她形容,是份人工高福利好的優差。

「直頭係 Queen姐(《女王辦公室》汪明荃角色)後生版呀!我呢個樣,班鬼佬又嗒糖。」

有日行街被模特兒公司看中,對方慫恿她去選美,她糊裏糊塗就去了。臨走時還跟老闆說:“ I’ll be back”,結果,是條不歸路。

「我份人做事一向手起刀落,決定了,就不回頭。」

當年選美冠軍是李克勤太太盧淑儀,只有郭少芸至今仍留在圈中。她幸運,選美後只行行企企了三年,便演《真情》。之後有《大鬧廣昌隆》、《先生貴姓》、《錦繡良緣》等,第二女主角位置坐得穩穩陣陣,形勢大好。

「你知唔知之後嘅處境劇《皆大歡喜》係由《錦繡良緣》演變出嚟?趙學而個角色,原來由我演。」

《錦繡良緣》在 01年農曆新年檔大收旺場,觀眾都愛看郭少芸跟梅小惠鬥嘴。誰也沒想到郭少芸居然辭演接近八百集的《皆大歡喜》,否則,命運肯定改寫。

「成嚿肥豬肉已經食咗落口,又吐番出嚟,因為突然之間撻着咗個危機意識掣。當時三十二歲,覺得自己除咗拍戲之外乜都唔識,好冇安全感,係咪就咁拍一世?老啲咁點?做 GiGi姐(黃淑儀)?再老啲呢?做夏萍姐?唔係話佢哋唔好,我係怕觀眾唔想再睇郭少芸。如果三十二歲唔走,四十二歲時更加冇勇氣走,唔通到時先出去搵工叫人『俾個機會』?」


冇料到

郭少芸有點神經刀,做事快和狠,如她所言,決定了,就不回頭。她放棄如日方中的事業,到胞姊的製作公司當客戶經理,一切由零開始。

「客人見到有個明星招呼自己,最初好驚喜,講多兩講,就覺得我『流』。我啲戲都唔差,點都扮到懶掂咁吹幾句,但頂!當個客問我十句,我十句都答:『返去 check下再覆你』,人哋就知我冇料到啦!」
幸好老闆是自己家姐,容許三十二歲的她超齡再培訓。

「有次影內衣褲,我負責排 run down,嘩!度到頭都大,到底就攝影先定就燈光先?定係就啲胸圍顏色先?你知啦, model換來換去好麻煩……最後度咗十個方案,選犧牲最少嗰個。」
經一事長一智,郭少芸這才知原來自己一直身在福中。

「以前拍戲,一有不滿只識吠PA:『做乜事一點開完後要等到七點?之後又要等到十二點?今日又要我叫三飛呀?』可知人哋已經係粉身碎骨咁幫你安排,公司唔係只得你一個!我做製作公司嗰段日子,上至見客,下至幫 model挽鞋同執垃圾都做,我覺得係上天俾個機會我見識事物嘅另一面,等我真正開竅。」

在製作公司做了幾年,又與家姐和姐夫搞起食肆來。她的宗旨是「人做我唔做,殺出一條新血路」。她在銅鑼灣搞專門吃羊肉的餐廳,遇上 SARS,結果,真是一條「血路」。
「輸到 PK,我哋三個你眼望我眼,結論係:『終於知道點解人哋唔做啦!』當推咗架歐洲車落山,唔忿氣㗎。」

他們幾個在朗豪坊重整旗鼓,今次做大路西餐,郭少芸一有空就去捧餐,這次,很快回本。

「我出現,只係幫到營業額5-10%左右。我好明白用明星做招徠更加要打醒十二分精神,因為好同唔好嘅 comment,都會打孖上。」


好交叉鍾意做戲

離開無綫四年,見識過腥風血雨的商場,眼界到底有點不同。最大得着,是知道甚麼是自己真正所愛。

「做生意嗰幾年,《金枝慾孽》爆紅,我成日幻想自己可以做邊個?梗係唔係班小主啦,我冇咁後生;張可頤?我又唔夠佢咁高傲同靚漏……點解仲有幻想?係因為自己原來仲好『交叉』鍾意做戲!」
○五年客串《火舞黃沙》,正式回歸。

「雖然做生意蝕過好多錢,但問心,真係冇後悔。眼界闊咗,得到嘅經驗,係錢買唔到。如果冇出去見識過另一個世界,我估我仲係以前嗰個又寸又唔識體諒人嘅郭少芸。我敢講,依家對啲 PA好好。」
近年看郭少芸,不論是劇集還是處境劇,都恰如其份。要硬淨時硬淨,要搞笑時更是放低身段。

「以前好遊戲人間,喺片場無論波鞋定燒賣都可以同人吹一餐。有次阿戚(戚其義)就鬧我:『你專心啲得唔得?』我仲唔識死:『唓,你嗌 3, 2, 1,我交到戲咪得囉!』阿戚就話:『你睇林保怡,人哋唔止 3, 2, 1交戲,係全日都在狀態!』我突然醒覺,既然知道自己好『交叉』鍾意做戲,依家日日返工都好『交叉』開心,點解唔做好佢?我可以講,依家做戲比以前專心咗好多。」

唔飢渴

一個演員是認真地做還是遊戲人間,觀眾是看得出的,難怪她近年劇接劇。事業已從新上軌道,現階段欠的,只是個枕邊人。

「朋友叫我搵番條仔,點搵呀?唔通登報紙?我呢個年紀搵個成熟嘅唔難,但我估啲筍盤會想搵個廿四歲囉!就算唔廿四都卅四啦,點會想搵個四十四?但我又冇打算施展渾身解數同啲廿四歲妹妹爭,所以,都係算罷啦!」

郭少芸八月才四十三歲,但她豪邁,不介意自比四十四。

「單身咗好多年,唔係風涼話,真係慣咗。早排感冒,自己揸車去睇醫生,冇乜所謂。我唔 mind有個男朋友,但絕對唔係飢渴嗰種。」

郭少芸眾所周知有兩段情,第一段是拍《真情》時搭上有婦之夫劉少君。

「當年細路女,投入咗角色後唔識走番出嚟。依家唔同喇,拍《拳王》時我都好愛黃德斌,但之後識走番出嚟。今日再問我,任何一個有老婆嘅行埋嚟,我都會叫佢返屋企瞓。」

第二段情是無綫編導「高佬」鍾國強,兩人拍拖四年,大家都以為他們會修成正果,豈料最後也是分手收場。

「我哋仲係好朋友,但撻唔着喇。與其諗翻撻,不如向前望好過啦。我講過,我做事向來不回頭。」

她喜歡幽默型男士,最怕悶蛋。

「 Bobby(歐陽震華)梗係正啦,就算阮兆祥都 OK,雖然佢爛 gag咗啲。」


十分一溫柔

郭少芸的氣場很強,令人不禁要問:「到底你性格真是如此強悍,還是環境造成?」

她搖搖頭,沒有答案,只說了一個小案例。

話說《愛。回家》她飾演的馬柔出場時,黃子雄曾這樣形容她:「呢個只係一個女人張牙舞爪去掩飾佢脆弱嘅內心。」

郭少芸一聽這句對白,立刻渾身雞皮疙瘩。

「嘩!唔通個編審瞓喺我牀下底?

有時連我都分唔清究竟自己性格真係咁強,定環境迫成,我估,兩者皆有。我點都有溫柔一面,但唔多,十分一啦。」

能夠溫柔,原來也是一種福氣。




馬柔發現男友偷食後選擇用「笨豬跳」令自己重生,瀟灑得令人咋舌。郭少芸說:「其實馬柔即係郭少芸。不過玩笨豬跳,真係好『交叉』驚!」



《衝呀!瘦薪兵團》裏的「鬥牛㹴」,令人又愛又恨。



《拳王》不是主線,郭少芸便做男人背後的女人。



《大鬧廣昌隆》我們都記得「小芙蓉」,但「倀雞英」一樣好搶戲。



《錦繡良緣》原來是《皆大歡喜》的前奏。「係有少少肉赤冇咗嚿錢,但冇後悔。」



食肆在朗豪坊開業初期,郭少芸一收工便去捧餐。



選美的時候,應該是郭少芸最「溫柔」的時候了。



拍《真情》,動了真情。



忽然1周 第887期
2012.07.27
, , ,
創作者介紹

BELOVED

婕兮 發表在 痞客邦 PIXNET 留言(0) 人氣()