BELOVED

愛波又愛車

張智霖、郭富城與沈嘉偉三人老友鬼鬼，事關三人的嗜好都一樣，第一樣是打枱波，第二樣就是玩車，三人對車的要求各有不同，不過他們同樣喜歡有「8」字的車牌，沈嘉偉最愛「8882」的車牌，郭富城就喜愛「887」，至於張智霖最愛的數字，當然是代表他生日的「827」，而Chilam其中一個車牌之前的英文字，更是太太袁詠儀 英文名的縮寫，可見老婆在他心目中的位置有多重要！

星島日報　2009.09.04

---

張智霖生日做阿四 陪妻食茶餐廳
靚靚伍姑娘馬路中央玩到喪

張智霖（Chilam）近日機緣巧合之下復出樂壇，雖然工作令Chilam變得忙碌起來，但他一有時間亦用來陪伴兒子「魔童」，就連上星期四，Chilam38歲生日當日，他跟老婆袁詠儀（靚靚）相約好友伍詠薇及練海棠齊齊到茶餐廳食午餐慶祝，隨即趕着回家湊仔。

文：陸宜 圖：徐錦池、容子堂、甄朝健

張智霖（Chilam）闊別樂壇多年，近日終於成功簽約新唱片公司，更推出新歌《妳太善良》，稍後更會拍攝無綫新劇以及跟當家花旦胡杏兒合唱，實行要強勢回歸！話雖如此，但Chilam一有時間大部分都會用來照顧兒子魔童。

上星期四，是Chilam38歲牛一，不過他並未有大肆慶祝，反而於下午時分，跟太太袁詠儀相約好友伍詠薇與練海棠兩夫婦齊齊到跑馬地一間茶餐廳歎平價午餐慶祝，最後更由伍姑娘請客，食飽飽離開餐廳，4人情緒高漲，不時大聲講大聲笑，又不停周圍張望，似乎要看看附近有沒有記者埋伏，四個老友更像大細路般，邊行邊玩，當伍姑娘跟靚靚行到大馬路中間，更忘情地傾到你拍我、我推你，還哈哈大笑，沒有留意到身邊有輛小貨車正在倒車，幸好練海棠及時提醒才免生意外。

做司機兼修理工人

及後生日的Chilam就行先一步，走到附近一間電器鋪買燈膽，而練海棠就在門外講電話講到大發脾氣，伍姑娘馬上上前安慰，而靚靚見狀即時收起笑容，走到電器鋪門外等老公，未幾，練海棠便先行離開，接著，Chilam又走到另一間鋪頭買鎖頭，買完所需物品後，3人便齊齊返回寓所，Chilam看來在生日也要回家做修理工人！

Chilam生日前幾天，4人又一齊同遊中環，不過今次Chilam就帶埋兒子魔童，四人走到雲咸街一間畫廊時，就齊齊停了下來欣賞名畫，Chilam還教魔童睇畫，不過魔童似乎沒有興趣，於是一班人又慢慢向下行，原來Chilam的座駕一早已經停在路邊，最後一行人齊齊跳上車，Chilam做司機載他們離去。

■靚靚和伍姑娘邊行邊傾，又哈哈大笑，走到馬路中間時，靚靚頑皮地拍打伍姑娘，兩人你推我撞，猶如大細路，完全罔顧交通安全，而張智霖就乖乖做司機。
■張智霖無論任何時候都負責全程湊仔，真係夠晒廿四孝。
■張智霖發現有記者，即時抱着兒子快步離去。
■張智霖一家和伍姑娘兩夫妻老友鬼鬼，連日相約共膳，有傾不完的話題。
■張智霖生日當天，仲要買燈泡和門鎖，趕返屋企做維修。
■老公買門鎖，靚靚和伍姑娘就在門外有傾有講。
■張智霖買完燈泡，還細心地檢查。

星島日報　2009.09.04